Бүгін Теректі ауданының Подстепный ауылында «Гүлдене бер, туған ел» атты республикалық-экологиялық жастар акциясы аясында облыс басшысы Алтай Көлгінов, аудан әкімі Мұрат Мұқаев пен орынбасарлары, «ҚазИИТУ» ғылыми-білім кешенінің студентері мен ауданымыздың белсенді жастарының атсалысуымен 1000-ға жуық көшет отырғызылды.
Ауа райының қолайсыздығына қарамастан, туған жерімізді көркейтуге, таза ұстауға негізделген шараға 15 округ тұрғындары түгел қатысты.
- «Көктемнің басталуы – жұмыстың қызуы» дегендей, бүгін біз Бүкілқазақстандық ағаш отырғызу күніне барлық ардагерлермен, жастармен қатысудамыз. Науқан барысында облыс бойынша 50 мыңға жуық тал егіледі деп жоспарлануда. Елбасымыз Н.Назарбаев өзінің «Болашаққа бағдар: рухани жаңғыру» атты мақаласында туған жерді көркейтуге жұмыстануды тапсырған болатын.
Расымен, аймағымызды өзіміз күтіп ұстамасақ, ешкімнің бізге қол ұшын бермесі анық. Осы орайда облыс тұрғындарына, жастарға алғыс айтамын. Баршаңызға рахмет! - деді облыс әкімі Алтай Сейдірұлы.
«ҚазИИТУ» ғылыми-білім кешенінің студенттік ректоры Нұрзада Сақтағановтың айтуынша, Теректі өңіріне 40 шақты студент келіп, сауапты іске өз үлестерін қосты.
Аягөз АЙБАРҚЫЗЫ
Теректі ауданы
zhaikpress.kz
