Шыңғырлау ауданында Наурыз мейрамы дүркіретіп аталып өтті. Аудан орталығына киіз үйлер мен шатыр тігіліп, сахна төрінде мерекелік бағдарлама ұсынылды. «Қош келдің, Наурыз думан» атты театрландырылған мерекелік шара да көрсетілген қойылымдар ұлттық мерекенің қадірін, құндылығын көрсетті. «Қыдыр ата», «Ұмай ана» баталарын берсе, әжелеріміз салт-дәстүрден сырт шертті. Жеті келін Наурыз көженің жеті дәмін таныстырып өтіп, жастар қауымы әннен шашу шашып, көрерменге жырдан алқа тақты. Кейін концерттік бағдарлама бастау алды. Ең алдымен аудан әкімі Мұрат Өмірәлиев сөз сөйлеп, шыңғырлаулықтарды мерекемен құттықтады.
Жиылған жұртқа арналып мың бұралған бишілер би биледі, күмбірлеген күй тартылып, әсем ән ауыл көгінде қалықтады. Мерекелік көрініс пен концерттік бағдарлама халыққа тамаша көңіл күй сыйлап, бір марқайтып тастады.
Сонымен қатар ұлттық ойындар сайыстары өткізілді. Келген аудан тұрғындары риза болып, мерекені керемет көңіл күймен атап өтті. Тігілген киіз үйлер мен шатырларды жауапты мекемелер мерекеге сай безендіріп, ұлттық тағамдардан дастархандарын жайып, қонақтарды қабылдады. Ыстықтай бауырсақтар мен Наурыз көжелер таратылды. Шатыр ішінде үлкендерге бас беріліп, бата алынды. Киіз үйлерге кірген қонақтарды ән айтып, құшақ жая қарсылады.
Төл мейрам жыл сайын жаңашаланып, жыл сайын мәртебесі биіктеп келе жатыр. Үлкен-кішісі асыға күтетін ұлттық мерекеміздің осындай кең көлемде атап өтілгені қуантады.
Гүлжазира Асу,
Шыңғырлау ауданы
