Ақсай қаласындағы №7 мектепте «Білім сапасын арттыруда тұлға қажеттілігін дамыту» атты қазақ тілі мен әдебиет пәні мұғалімдерінің облыстық семинары өтті.
Семинарға Орал қаласынан және барлық ауданнан қазақ тілі мен әдебиеті пәнінің әдіскерлері мен мұғалімдері қатысты. Бұл семинардың мақсаты қазақ тілі мен әдебиеті пәнінің мұғалімдерін кәсіби дамыту, білім беру мазмұнын жаңарту, жаңашыл бағытта сабақ өткізу, оқушылардың шығармашылық дағдыларын қалыптастыру және жаңа әдістермен оқушыларды оқыту.
Ең бірінші кіріспе «Үйрену – бөлісу – табысқа жету» атты жас педагогтің тәжірибе бөлісуімен басталды. Әрі қарай №7 мектептің педагог-психологтары Алмагүл Боз бен Ақтоты Ешмұханова «Көтеріңкі көңіл күй» атты психологиялық тимбилдинг өткізді. Семинардың екінші бөлімі шеберлік алаңы аталып, мұғалімдер өз біліктіліктерін көрсетті. Қаламыздың №6 мектеп-лицейінің мұғалімі Кенжеғаным Ақашева «Құндылықтар арқылы тұлға бойында ұлттық сананы жетілдіру», №3 ЖОББМ мұғалімі Жанат Алыпсоқова «Қазақ тілі мен әдебиеті сабағында функционалдық сауаттылықты дамытудың жолдары», Бөрлі №1 ЖОББМ мұғалімі Тоғжан Аюпова «Көркем әдебиет және z ұрпағы», Қарақұдық МББК мұғалімдері Гүлбақыт Таменова мен Арайлым Тасымғалиева «Оқушылардың оқу сауаттылығын дамыту жолдары» тақырыптарында шеберлік сағаттарын өткізіп,тәжірибелерімен бөлісті.
Іс-шараның келесі бөлімі ашық сабақтарға арналды. Ашық сабақтар бөлімінде №7 мектеп мұғалімдері Любовь Тұрсынғали 6-сыныптармен қазақ әдебиетінен Алтай Асқардың «Прописка» әңгімесін, ал Ақмарал Шүйінішқалиева 9-сыныптармен Несіпбек Айтұлының «Бәйтерек» поэмасын талдады. Сонымен қатар Шолпан Аймухамбетова 10-сыныптарға қазақ тілінен «Ұлы даланың сәулет өнері» атты ашық сабақ өткізді.
Келесі төртінші бөлім оқушылармен жұмысқа арналды. №7 ЖОББ мектептің мұғалімдері Лариса Кузеева мен Үміт Алтаева мектептің әр түрлі бағыттағы облыстық, республикалық олимпиада және байқауларға қатысып, жүлделі орындар алып жүрген оқушыларымен «Дарынды ұл-қыз, жарқыраған жұлдыз» атты шара ұйымдастырды.
Соңғы «Жас мамандар» бөлімінде ауданымыздың жас мұғалімдері №3 ЖОББ мектепте «Бала шақтан – болашаққа» атты әдеби шара ұйымдастырып, көрініс қойды. Облыстық семинар осы бөліммен қорытындыланды.
Айдана Абдрахманова,
Бөрлі ауданы
zhaikpress.kz
