Жаңақала ауданы әкімі Алпамыс Көшкінбаевтың жұмыс жоспарына сәйкес жыл соңында ауыл тұрғындарымен кездесуі басталды. Осыған орай бүгін Жаңажол, Мәстексай округтерінің халқымен жиын өтті.
Оған аудандық мәслихат депутаттары Дәурен Жағыпаров, Қобылан Мұхамбетов, аудандық жер қатынастары бөлімінің басшысы Есен Бекболатов, тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Абат Ишанов, ауандық аурухана басшысы Дәурен Кукенов, аудандық электр торабы мекемесінің басшысы Сәтжан Ғабдуллин, аудандық полиция бөлімінің жергілікті полиция қызметі бөлімшесінің бастығы және полиция майоры Ержан Макишев қатысты. Округ әкімдері Айбек Ишанов пен Ержан Тілепбегенов баяндама жасаған соң, Алпамыс Жаңабайұлы ағымдағы жылы аудан аумағында атқарылған істер легін атап өтіп, келер жылға жоспарланған жобаларға тоқталды. Сонымен қатар қос округке қатысты өзекті мәселелерді де назардан тыс қалдырмай, бірқатар жұмыстардың шешімі табылғандығын жеткізді.
Жиын барысында ауыл халқының көтерген мәселелеріне заң аясында жауап беріп, сала басшыларына тиісті тапсырмалар берді. Сөз арасында жеке кәсіппен айналысуға ниетті тұрғындарға қашанда қолдау көрсетуге даяр екенін жеткізіп, төртінші деңгейлі бюджет бойынша округ басшыларына өзге жақта тіркеуде тұрған ЖК пен ЖШС-терді ауыл ішіне тіркесе, олардан түскен салықтың сол аймақтың қажетіне жарап, ауылды түлетуде пайдасы зорын айтып кетті.
Жүздесу соңында аудан басшысы жеке сұрақтары бойынша қабылдау өткізді.
Айзада Ақбасова,
Жаңақала ауданы
