Жаңақала ауданы Пятимар ауылдық округіне қарасты "Роща" тоғайында жастар ресурстық орталығының ұйымдастыруымен және "Альбетьяров Е. К." жеке кәсіпкерлігің қолдауымен "Алтын шабақ – 2024" әуесқой балықшылар сайысы өтті.
Шараға аудандық ішкі саясат бөлімінің басшысы Азат Мұқанов, Пятимар ауылының әкімі Б. Рамазанов және “Альбетьяров” жеке кәсіпкерлігінің өкілі Н. Мусаұлы қатысты. Балық аулау қабілеттерімен бақ сынасуға түскендердің саны 30-дан астам адамды құрайды. Аталған шараға жиналған қонақтар сөз алып, қатысушыларға сәттілік тіледі. Салауатты өмір салтын насихаттау, жастардың бос уақытын тиімді пайдалану, әуесқой және спорттық балық аулау түрін кеңінен дамыту мақсатында өткізілген сайыста орындарға және номинацияларға ие болған азаматтарды аудан әкімі Алпамыс Көшкімбаев құттықтап, алғысхатпен марапаттады.
Сайыс қорытындысы бойынша басты орынды Қайнар Жұмашев, екінші орынды Аңсар Сәлиев және үшінші орынды Ерген Жақсыбаев иеленді. Сонымен қатар, аға буыннан Сәбит Есмағамбетов “ Ардагер балықшы” және Бақтияр Кеңесов “Ең жас балықшы” аталымдарымен марапатталды. Одан бөлек дәмі тіл үйірер тағамды әзірлеген Талапқали Садировқа “Ең дәмді сорпа” номинациясы табыс етілді.
Аруғаным Қазиева,
Жаңақала ауданы
