Бүгін «Балалар – әлемнің бақыты» деген атаумен Жаңақала аудандық психологиялық-педагогикалық түзеу кабинетінде халықаралық балаларды қорғау күніне орай ерекше білім беруге қажеттілігі бар бүлдіршіндерге арналған мерекелік шара өтті.
Мекеме ауласында тақырыпқа сай көркем безендірілген ертеңгіліктің шымылдығын кабинет басшысы Айгүл Әлмаратқызы ашып, құттықтау сөз кезегін аудан әкімнің орынбасары Руслан Ғұмарға ұсынды.
Шара барысында балдырғандар «Қуыршақ», «Біз бақытты баламыз» әндерін шырқап, «Сәйгүлік», «Қазақстан» биін керемет орындады. Сондай-ақ ұстаздарымен қосыла ұлттық нақышта жүн сабап, сан түрлі аспапты шертіп, үлкен қошеметке бөленді.
«Мақта қыз бен мысық» ертегісін сахналаған балақайлар да өз рөлдерін шебер алып шықты.
Ата-аналарымен “Жануарларды тамақтандыр”, “Жемістерді боя” секілді қызықты ойындар ойнап, мәз-мейрам болды.
Ертеңгілік соңында барлық балаларға естелік сыйлықтар табыс етілді. Ата-аналар ұжымға ризашылықтарын білдіріп, ақ тілектерін аямады.
Айзада Ақбасова
Жаңақала ауданы
