Бүгін Рухани орталық ғимаратында аудандық Аналар кеңесі және Әжелер алқасының ұйымдастыруымен «Әке – тәрбие тамыры» атты жиналыс өтті.
Сөз алған Аналар кеңесінің төрайымы Ақмарал Сапарова ауданға танымал үлгілі отбасыларды таныстыра келе, жанұядағы әке мен бала рөліне жетік тоқталды. Сондай-ақ, қазіргі таңдағы ақсап тұрған мәселенің бірі – бала тәрбиесіне де түсінік жүргізді.
Әрі қарай, №16 өрт сөндіру бекетінің басшысы Еркебұлан Нұғманов пен Жаңақала ауданы полиция бөлімі бастығының кадр саясаты жөніндегі орынбасары полиция майоры Ердәулет Бисенғалиев ұйымдастырушыларға өз алғыстарын білдіріп, отбасыдағы әке тәрбиесінің маңыздылығы мен шаңырақтағы жеңіл мәсеселер жөнінде баяндады.
Сонымен қатар, күн-түн деп дамыл таппастан еңбек етіп жұрген әскери қызметтің кейбір сәттерінде отбасыларына көңіл бөлуге үлгермейтіндерін де жасырмады. Ардагер ұстаз, аудандық медиатор Апақаева Рая жиынға уақыт бөліп қатысқан ерлер қауымына алғысын білдіріп, өршіп тұрған сауалдың бірі – ажырасу мен келіспеушілікті атап өтті. Сондай-ақ, бір қолымен бесік тербетсе, бір қолымен әлем тербетіп жүрген ақ жаулықты аналарымызды да таныстыруды ұмытпады.
Жеке кәсіпкер (ИП «Азалия») Динара Жұматаева мен тігінші Зарина Даумова дайындаған туындыларын көпшілікке ұсынды. Бірі тәтті бәліштер мен дәмі тіл үйірер тоқаштарға қызықса, енді бірі қазіргі сән үлгісіндегі жастықтар мен сан алуан керамикалық ыдыстарға көздері түсті. Шара соңында қатысушылар естелік суретке түсіп, көңілді тарқасты.
Ақерке Мәлікқызы,
Жаңақала ауданы
