Су – тіршіліктің қайнар көзі, өмірдің қуаты. Тазалықты білетін, сүйетін дана халқымыз судың қадірін жақсы түсінген, бұлақ көзін жаппай, керісінше бұлақ көзін ашуды сауапты іс деп білген.
С.Меңдешев атындағы ауылдық округіне және Қызылоба ауылдық округіне жаңа су құбырлары тартылып, тұрғындар таза ауыз сумен қамтамасыз етілді.
Ең бірінші болып С.Меңдешев атындағы ауылдық округте ашылу салтанаты өтіп, оған аудан әкімі Наурызбай Қарағойшин, аудан әкімінің орынбасары Ақнұрлы Еслямғалиева, бөлім басшылары және ауыл тұрғындары қатысты. Алғаш болып сөз алған аудан әкімі Н.Қадырбайұлы Тәуелсіздік мейрамымен тұрғындарды құттықтап, болашақта бұндай жақсы істер рет-ретімен жүзеге аса беретіндігін тілге тиек етті. Одан кейін лента қиылып, әжелер шашу шашты.
Одан әрі Қызылоба ауылындағы су құбырының ашылуы да жоғары деңгейде өтті. Аудан әкімі Наурызбай Қарағойшин мердігер, "Құрылыс Газ" ЖШС өкілі Сергей Гушинге аудан жұртшылығының атынан ризашылығын білдіріп, алғыс хат табыс етті.
Ауыл ардагері Жұмағали Рамазанұлы сөз сөйлеп, аудан басшылығына және мердігерге алғысын жеткізді. Сәні келіскен су құбырының көк лентасы салтанатты рәсіммен қиылып, әжелер шашу шашып, ел-жұрт мәре-сәре болды.
Жанайдар Болатбекұлы,
Жаңақала ауданы
zhaikpress.kz
