Рухани орталық ғимаратында Жаңақала аудандық кітапхана ұжымы мен жастарды жұмыспен қамту жөніндегі ресурстық орталығының ұйымдастыруымен ел мерейін асырған жерлес спортшы, самбодан Республика біріншілігінің жеңімпазы, Қазақ СССР чемпионатының күміс жүлдегері, Чехия мемлекетінде өткен әлем чемпионатының қола жүлдегері, бүгінде зейнет жасындағы Марат Есмағұловпен кездесу кеші өтті.
Алдымен экраннан Жуалыойдың ұлпа құмында аунап өсіп, балалық шағынан спортты жанына серік еткен ағамыздың ғұмыр дариясынан бейнешолу көрсетілді. Жайлы атмосферада өрбіген сырласу кешінде спорт саласында өлшеусіз еңбегі бар Марат Паритұлы жайында біраз тың мағлұматтармен таныс болдық. Шара барысында ардагер спортшының шәкірттері болған Дәурен Мерешов пен Жасқанат Сыралиев ұстаздары жайлы жылы естеліктерімен бөлісті. Марат ағамыз өз сөзінде алдына мақсат қоя білген адам ғана биік белестерді бағындырып, жоғары жетістікке жететінін айтып өтіп, талай тартысты додаларда тақымдарын қысып, бүгінде дүниенің бір кірпіші боп қаланып жүрген Жанболат Төлегенов, Саламат Сертеков, Азамат Анешов, Жанболат Гумаров, Рада Мұхамбетқалиева, Аяжан Атауова секілді шәкірттерін мақтан тұтатынын жеткізді.
Аудандық жастар ресурстық орталығының басшысы Дәурен Құбайдоллаұлы қашанда салтын сақтап, дәстүрін дәріптеген, ғұрпын ғұмырына азық етіп, әдебінен жаңылмаған халқымыздың әдеті бойынша Марат Паритұлының иығына шапан жауып, бапкеріне деген құрметін көрсетті. Шара соңында барша қонақтар кеш иесінің өмір жолына арналған кітап көрмесімен танысып, естелік суретке түсті.
Айзада Ақбасова,
Жаңақала ауданы
zhaikpress.kz
