«Бір ел – бір кітап» республикалық акциясы аясында қазақ прозасына өзгеше өрнек, ғажайып сыр-сипат әкелген көрнекті қазақ жазушысы, балалар әдебиетінің бәйтерегі Бердібек Соқпақбаевтың шығармаларын оқып насихаттауда Жәнібек аудандық орталықтандырылған кітапханалар жүйесі жыл бойы әртүрлі шаралар мен байқаулар өткізіп келеді. Бүгін өткізілген шаралардың жыл қорытындысы бойынша марапаттау шарасы өтті.
Шара Бердібек Кіріспайұлының жазушыға арнаған «Бәйтерек» өлеңімен ашылды. Әрмен қарай аудандық мәдениет, тілдерді дамыту, дене шынықтыру және спорт бөлімінің басшысы Нұрболат Садырбаев Х.Есенжанов атындағы облыстық балалар мен жасөспірімдер кітапханасының ұйымдастырған «Бердібек Соқпақбаев әлеміне саяхат» атты жас иллюстраторлар байқауына қатысқан оқырмандары мен жетекшілердің марапаттарын табыстаса, аудандық орталықтандырылған кітапханалар жүйесінің директоры Светлана Джукина «Қожа біздің балалық шағымыздың батыры» атты аудандық «Үздік көріністер» онлайн бейнебаян байқауының дипломдары мен алғысхаттарын берді.
Шара барысында көрермен назарына Алматы қаласында тұратын жазушының қызы Самал Бердібекқызының кітапханашылар мен оқырмандарға алғысын жеткізген бейнебаяны ұсынылды.
Аудандық модельді балалар кітапханасының кітапханашысы Мөлдір Ақпанова «Әдебиетке балалықты әкелген Бердібек» атты кең көлемді кітап көрмесі мен көрнекіліктерден құралған инсталляциямен таныстырып өтті. Көрмеге жазушы туралы деректер, жазушының шығармалары, отбасылық фотосуреттер мен қаламдастарының жазушы туралы ой-пікірлері, оқырмандардың жазушының шығармаларына орай салынған суреттері және «Шекарадағы кездесу» жобасы аясында РФ, Волгоград облысының Палласовка ауданы кітапханасының оқырмандарының «Аяжан» повесі бойынша салынған суреттері қойылды.
Гүлзара Мәди
Жәнібек ауданы
