Бүгін учаскелік комиссия мүшелері, байқаушылар, сенім білдірген адамдар және қоғамдық бірлестік өкілдерінің қатысуымен сайлау туралы заңның талаптарына сай сайлау учаскелерін ресми түрде ашты. Таңғы 07:00-де басталған дауыс беру кешкі 20:00-де аяқталады.
Сайлау №136, 137, 138, 139, 140 учаскелерінде ұйымдастырылуда. Жалпы сайлаушылар тізіміне 4957 адам енгізілген. Сайлау процессін бақылауға азаматтық қоғам өкілдерінен 6 адам қатысуда.
Сайлау қорытындысы бойынша аталмыш ауылдық округтің әкімі анықталатын болады.
67 жастағы Жәнібек ауылының тұрғыны Бәтима Идрисова №138 сайлау учаскесіне келіп, өз таңдауын жасады. Аталған сайлау учаскесінің төрағасы Максим Сүндетов Б.Идрисоваға учаске атынан сый-сияпат табыстады.
Темірлан Аронов бірінші дауыс берді
- Бүгін ауыл әкімін сайлау үшін учаскеге келдім. Жауапкершілік жүгі халыққа түседі. Ел басқарып, халық көңілінен шығатын азаматты таңдап алу — біздің еншімізде. Әр ауылдың өзіндік мұң-мұқтажы мен атқарылар ұлан-ғайыр істері бар. Әкім үшін ең бастысы, осы істердің басы-қасында халықпен бірге жүру.
Бұл сайлау — қызметін адал атқарып, халық алғысын алам дегендер үшін зор мүмкіндік. Еңбегін бағалап, ел қолдап жатса, ердің беделінің биіктегені сол емес пе? Ең бастысы, арына, абыройына адал азаматтарымыз әкім болса екен, - дейді Темірлан.
Айта кету керек, ауылдық округ бойынша 4957 тұрғын өз дауысын беретін болады.
Темірлан дауыс берген №138 сайлау учаскесінде 1031 сайлаушы бар.
Гүлзара Мәди
Жәнібек ауданы
