Бүгін Тәуелсіздік күні қарсаңында Жәнібектегі ардагерлер үйінде шара өтті. Шара басталмас бұрын оқушылар Ералы Темірболат пен Әділет Ғұмаров С.Сыпатаевтың «Көк бөрім көкке ұлыған» поэмасынан үзінді оқыды.
Тәуелсіздік – ұлтымыздың бостандыққа ұмтылған асыл армандары мен өр намысының, қайтпас қайсар рухының жемісі. Ал 16 желтоқсан – сол арманға жеткізген, халқымызды, елімізді жаңа белеске көтерген, Кеңес Одағының құрсауынан босатқан күн.
Құттықтау сөз аудандық ішкі саясат бөлімінің басшысы Миранбек Ибатовқа берілді.
– Құрметті ардагерлер, жас жеткіншектер, баршаңызды Тәуелсіздік күнімен құттықтаймын. Жалпы, тәуелсіздік күніне байланысты еліміз бойынша көптеген танымдық шаралар, дөңгелек үстелдер оздырылуда. Осындай шаралар біздің ауданымызда да жоспарға сай өтіп жатыр. Тәуелсіздік деген біздер үшін қастерлі ұғым. Осы жолда көптеген жастарымыз құрбан болды. Тәуелсіздіктің арқасында еліміз дамып, көптеген әлем елдерімен серіктес, әріптес бола білді. Бүгінде біздің елімізді барлық елдер таниды, біледі. Әрі қарай еліміздің болашағы жарқын, алдымызда жүрген аға буын ардагерлер аман жүріп, бізге ақылшы болсын, жас жеткіншектер алаңсыз білім мен тәрбие алып, еліміздің лайықты азаматтары мен азаматшалары болсын. Ардагерлер үйінде өтетін шараларға үнемі қолдау білдіріп, атсалысып жүрген аудандық орталық кітапхананың, демалыс орталығының және саз мектебінің ұжымына алғыс айтамын, - деді Миранбек Нұрланұлы.
Шара барысында аудандық саз мектебінің оқушыларынан құралған хордың орындауында «Туған ел», А.Оразбаева атындағы негізгі мектептің оқушысы Айжан Қабдрахим «Тәуелсіз ел ұраны», әнші Тамара Кафарова «Текті қазақ», әнші Алма Жанай «Егемен Қазақстан» әнін шырқатты.
Асқар Құсайынов
Жәнібек ауданы
