Бөкей ордасы ауданының әкімі Нұрлыбек Даумов «Жомарт жүрек - 2022» республикалық байқауында «Жыл тұлғасы» аталымы бойынша жеңімпаз атанған жерлесімізді қабылдады.
Қабылдау барысында аудан басшысы “Жомарт жүрек” иегеріне аудан тұрғындарының және өз атынан алғысын айтты. Сонымен қатар Нұрлыбек Даумов Нұрлыбектің бұл ісінің жерлестерімізге мотивация болып, ал қалталы азаматтарға үлгі болатынына үміттенетінін жеткізді.
Аудан әкімі жерлесімізге заттай сыйлығын да тарту етті.
Еске сала кетсек, Нұрлыбек Иманбаев 2021 жылдың 29 желтоқсанында "AVTO LOTO" лотореясынан "Hyundai Accent" маркалы, құны 7 519 000 теңге тұратын автокөлікті ұтып алған болатын. Дегенмен, Нұрлыбек Иманбаев ұтысын қаржылай алып қайырымдылыққа жұмсауға бел буады. Барлық қаржыны үшке бөлген Нұрлыбек жерлесіміз, Алматы қаласында өткен қаңтар трагедиясында қаза болған екі курсанттың отбасыларына 1 млн. теңге аударып, тағы 1 млн. теңгесін Орал қаласында тұратын 5 жасар қыздың еміне жұмсайды. Ал қалған 5 млн 519 мың теңгесін қайырымдылық қорына аударып, туған жері Бисен ауылындағы мұқтаж 2 отбасыға баспана алуға көмек көрсетеді.
Қайырымдылық көмегі арқасында Нұрлыбек Иманбаев Нұрлыбек ағымдағы жылдың 21 қазан күні Астана қаласында өткен «Жомарт жүрек-2022» республикалық байқауында «Жыл тұлғасы» аталымы бойынша жеңімпаз атанды. Сонымен қатар белсенді азаматтық ұстанымы, түрлі бағыттағы кең ауқымды қайырымдылық қызметі үшін ҚР Қоғамдық даму министрінің дипломымен және арнайы статуэткасымен марапатталған.
