Көктем шығысымен ауыл тұрғындары ауласындағы жерін дайындап, көкөніс баптап, бақша салуға қамданады. Қалаға базарларында жұрт көшетті таласып алып жатады.
Дегенмен, ерте көктемде, яғни, қыс аяғында үйіне арнайы ыдыстарға тұқым сеуіп, оны күн жылынған кезде бақшаға егетіндер де жоқ емес. Біздің өңірімізде ауласына жылыжай жасақтап, көкөніс егетіндер де бар. Аз болса да ұшырасып қалып жатады.
Күні кеше Казталов ауданы әкімінің орынбасары Рашид Иманғалиевпен бірге Талдықұдық ауылына барған сапарымызда осындай бір жылыжайды өз көзімізбен көріп қайттық. Ауласынан жылыжай салып, қияр өсіріп отырған талдықұдықтық Марат Иманғалиевтің бұл ісі көпке үлгі болмақ.
Шамамен ұзындығы 12 метр, ені 3 метр жерге соғылған жылыжай іші көкөністің өсуіне қалыпты температураны бейімдейді. Тек уақытында суаруды ұмытпау керек.
Мараттың өзі үйде жоқ болғанымен, оның анасы, аудан халқына жақсы танымал Айсұлу апамыз алдымыздан шықты. Оның айтуынша, ұлы осы жылыжайды салуға мемлекеттен қайтарымсыз грант алған. Аңқылдаған апамыз бізді жылыжай өнімінен дәм татқызды. Осы жылдың сәуір айында іске қосылған жылыжайда қияр егіліп, өнімін ауыл халқына сатылып жатыр. Керемет іс емес пе?!
Бір отбасына табыс кіргізіп жатқан осындай жылыжайды әр азамат өз ауласынан салып алуға мүмкіндік көп әрі мемлекет тарпынан да қолдау бар. Ойланып, іске асыруға болады. Тек ерінбейтін азамат болсын дейміз.
Нұр Рахман
Казталов ауданы
