Жәнібек аудандық мәдениет және демалыс саябағында Астана күніне орай мерекелік концерт ұйымдастырылды.
Аудан әкімі Тимур Шиниязов еліміздің жүрегі, бейбіт елдің шырағы болған Астана күнімен құттықтап, қадамы нық бас қаламыздың жыл өткен сайын маңызы артып, мәртебесінің өсе беруін тілеп, Қазақстан Республикасының Төтенше жағдайлар министрлігінің алғысхатымен Асыланбек Мақсотұлын марапаттады. Ұлттық домбыра күніне орай Батыс Қазақстан облысының мәдениет, тілдерді дамыту және архив ісі басқармасының алғысхатына «Жәнібек сазы» халықтық фольклорлық ансамблінің жетекшісі Анаргүл Кенжеғалиева, ансамбільдің домбырашылары Дамир Зинуллин мен Мәдина Қадырова ие болды.
Сонымен қатар «Мерейлі отбасы - 2024» ұлттық конкурсының Жәнібек аудандық кезеңіне белсене қатысып, «Өнерлі отбасы», «Ұлағатты отбасы», «Дарынды отбасы», «Өнегелі отбасы», «Үлгілі отбасы» аталымдарымен тиісінше Сүйінішев, Бисенғалиев, Бексейітов, Темірғалиев, Қарабалиндер отбасы марапатталып, аудандық «Жәнібек әйелдері» қоғамдық бірлестігінің атынан естелік сыйлықтарын иеленді.
Салтанатты шара Жақсыбай ауылдық округі көркемөнерпаздарының концерттік бағдарламасымен жалғасты. «Туған жер алтын мекенім» атты Астана күніне арналған мерекелік концертке аудан тұрғындары көп жиналды. Концерт алдында Жақсыбай ауылдық округінің әкімі Алмат Қаратаев сөз алып, жиналған қауымға қош келдің айтып, жақсы демалыс тіледі. Әрмен қарай қазақ биімен «Еркеназ» би ансамблі мың бұрала би билеп, кештің көркін ашып берді.
Домбыраның сүйемелдеуімен Есім Тұяқбай мен Ерданат Серіков «Ақжайық ару мекенім» әнін керемет денгейде шырқады. Күміс көмей әншілер Дәрия Жәрдем, Зинаш Жұмағалиева, Гүлдана Тінәлиева тамылжыта ән салды. Кеш соңында «Анамның жаққан ошағы» әуенімен жақсыбайлықтар кешті тәмамдады.
Бану Самат,
Жәнібек ауданы
