Орал қаласындағы Достық үйінде БҚО Қазақстан халқы ассамблеясының қолдауымен этностар апталығы аясында «Хаймат» неміс мәдени-ағарту қоғамының іс-шарасы өтті.
Қоғамдық даму басқармасы мен «Қоғамдық келісім» КММ қызметкерлері және жергілікті БАҚ өкілдерінің қатысуымен өткен шарада неміс ұлтының мәдениеті, салт-дәстүрі таныстырылды.
— Бұл күнде облысымызда 600-ге тарта неміс ұлтының өкілі болса, соның 130-ға жуығы осы неміс мәдени-ағарту қоғамына мүше. «Хаймат» облысымыздағы әртүрлі қайырымдылық акцияларына белсенді қатысып келеді, – деді аталмыш мәдени-ағарту қоғамының төрағасы Геннадий Франк.
Шара барысында «Хаймат» неміс мәдени-ағарту қоғамының тарихы сараланып, жылдар бойы атқарған жұмыстарына қысқаша шолу жасалды. Неміс ұлтының салт-дәстүрі, мәдениеті кеңінен таныстырылды. Ұлттық ойындар ойналды. Ертегі, аңыздары сөз болды. Роман Шевер есімді неміс мәдени-ағарту қоғамының мүшесі Әбдімомын Желдібаевтың «Ерке сылқым» күйін орындап, көпшілікті өнерімен тәнті етті. Іс-шара соңында неміс халқының ұлттық тағамдарынан дәм ұсынылып, дастарқан жайылды.
Әнуар Аманжол,
«Орал өңірі»
