Талай таланттың томағасын сыпырып, біраз палуанның спорттағы әкесі атанып үлгерген белгілі бапкер, ҚР еңбегі сіңген жаттықтырушысы Райбек Меңдіғалиев 55 жасқа толды.
Қазақ еліне Еділ Үсенов, Ерболат Байбатыров, Әйбек Ғабдешев, Нұрбол Серіков және Темірлан Көлбай сияқты палуандарды танытқан Райбек Ромашұлының өңір спортының дамуына қосқан үлесі көп. Саналы ғұмырын палуан баптауға арнаған білікті жаттықтырушының мерейтойына орай облыстық самбо федерациясы Райбек ағамызға темір тұлпар тарту етті.
Бапкер қуанышын бөлісуге оның барлық шәкірті келді. Самбошылар қаладағы оқушылар мен жастар сарайының алдына жиылып, Райбек Ромашұлына сыйлығын салтанатты түрде тарту етті.
Сондай-ақ самбодан төрт дүркін әлем чемпионы туған күн иесіне облыс әкімінің орынбасары Бақытжан Нарымбетовтың құттықтау хатын табыс етті.
Түгелбай Бисен,
zhaikpress.kz
