Батыс Қазақстан облысында коронавирус жұқтырған 147 науқас амбулаторлық ем алып жатыр, деп хабарлайды ҚазАқпарат тілшісі.
БҚО денсаулық сақтау басқармасының басшысы Арман Қалибековтің өңірлік коммуникациялар қызметі алаңында өткен брифингіде мәлім еткеніндей, соның ішінде 85-і немесе 57,8 пайызы Орал қаласында тіркелген.
Оның айтуынша, өткен аптамен салыстырғанда, амбулаторлық науқастар саны 68,4 пайызға төмендеді.
Сондай-ақ 14 инфекциялық стационарда 70 науқас бар, бұл өткен аптамен салыстырғанда, 59,8 пайызға аз. Стационарлар 9,3 пайызға толған.
Жансақтау бөлімшесінде жатқан 14 науқастың 13-і немесе 93 пайызы екпе алмаған. Бұлардың біреуі – 65-ке дейін, 13-і – 65 жастан, соның ішінде алтауы – 80-нен асқандар. 9 науқас ауыр, бесеуі аса ауыр халде. Инвазивті жасанды тыныс алу аппаратына 5, инвазивті емес осындай құрылғыға 7, оттегі көзіне 2 науқас қосылған.
«КВИ-мен ауырып, стационарлық ем алған адамдар көрсеткіштері бойынша оңалту емін алуына болады. Оңалту қалалық көпбейінді аурухана, Жаңақала ауданаралық сауықтыру орталығы және медициналық-санитарлық алғашқы көмек ұйымдарында жүргізіледі. Ауырлық деңгейін және созылмалы сырқаттарын ескере отырып, әр науқасқа жекелей сауықтыру жоспары жасалады. Оңалтуға тыныс алу гимнастикасы, дренажды массаж, физиоемдеу кіреді. Оңалту курсы 7-10 күнге есептелген», деді А.Қалибеков.
