2023 жылғы 21 желтоқсанда Орал қаласы әкімдігінің «Жолаушыларды әлеуметтік маңызы бар тұрақты тасымалдауға тарифтерді белгілеу туралы» қаулысы шықты. Онда қоғамдық көлікте карта арқылы немесе онлайн төлесе жол жүру тарифі 100 теңге, қолма-қол есеп айырысу үшін 200 теңге белгіленді.
Сонымен қатар «Қазақстан Республикасындағы көлік туралы» Қазақстан Республикасы Заңының 13-бабына және «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасы Заңының 6-бабы 1-тармағының 15) тармақшасына сәйкес, Орал қаласының әкімдігі мен Орал қалалық мәслихаты «Жолаушылардың жекелеген санаттарының жеңілдікпен жол жүруі туралы» бірлескен қаулы мен шешім шығарды.
Бұл туралы қала әкімдігінің баспасөз қызметі хабарлады.
7 жастан 18 жасқа дейінгі балалар тарифтің 50%, яғни карта арқылы немесе онлайн төлесе 50 теңге, қолма-қол 100 теңге төлейді.
Мүгедектігі бар адамдардың көмекшісі, зейнеткерлер, есту қабілеті нашар мүгедектер де тарифтің 50%, карта арқылы немесе онлайн төлесе 50 теңге, қолма-қол 100 теңге төлеп қатынайды.
Оралда тұратын зейнеткерлер саны жолаушылар тасымалына арналған тарифті бекіту кезінде шамамен 48 мың болған.
Биыл жеңілдігі бар жолаушылар қатарына зейнеткерлер де енді (зейнеткерлерге тарифтің 50% мөлшерінде жол жүру құқығы бар, яғни қолма-қол ақшасыз төлеу кезінде 50 теңге, қолма-қол есеп айырысу үшін 100 теңге).
2024 жылдың 8 қаңтарынан бастап жеңілдік карталары сатылымға шықты. Жеңілдік карталарын «Smart Qala Oral» ЖШС сатады. Сату нүктелері автобекет; «Алтындар» супермаркеті; «Астана» СҮ; ХҚКО, Исатай-Махамбет көшесі, 84; Құрманғазы көшесі, 173а-дағы«Мансап» орталығында, Зашаған кентіндегі «Жәңгір хан» СҮ бар.
Осы кезге дейін 14 300 карта сатылды. Күніне орта есеппен 2000-ға жуық карта сатылады.
Көлік карталарына тапсырыс Алматы қаласында орналасқан «Smart Qala Oral» ЖШС бас кеңсесінен жүзеге асырылады.
Барлық сату нүктесі қала тұрғындарына ыңғайлы болу үшін сенбі күні жұмыс істейді. Ал сату нүктесі жексенбіде тек автобекетте жұмыс жасайды.
zhaikpress.kz
