Орал NIS оқушысы Президент марапатын иеленді

2026 жылдың 24 тамызы күні Мемлекет басшысы Қасым-Жомарт Тоқаев Елорда төрінде халықаралық олимпиадалардың жеңімпаздарымен және жүлдегерлерімен кездесті. Жұлдызды оқушылардың ішінде Орал қаласындағы NIS оқушысы Шыңғыс Қарасаев бар.

Президентіміз дарынды жастарды «Қазіргі заманның нағыз батырлары» деп атап, білім жолындағы жоғары жетістіктері үшін қомақты қаржылай сыйлықпен қолдау көрсетті. Ақордадағы қабылдауынан соң «Назарбаев Зияткерлік мектептері» дербес білім беру ұйымының Басқарма төрағасы Әнуар Жанғозин да дарынды балалармен жүздесу ұйымдастырып, өз құттықтауын жеткізді.

Шыңғыс Қарасаев – республикалық және халықаралық білім додаларында топ жарып жүрген мақтаулы шәкірт, биылғы мектеп түлегі.

Айтулы жетістіктеріне тоқтала өтсек:

• Лингвистикадан Республикалық және Азия-Тынық мұхиты олимпиадасының алтын жүлдегері.
• «Математика және жобалау» халықаралық жобалар байқауының І орын иегері.
• Бобер халықаралық информатика байқауының II дәрежелі диплом иегері
• Желілік жасанды интеллект олимпиадасының алғыс хат иегері.
• Тайвань елінде өткен Лингвистика бойынша халықаралық олимпиаданың Құрмет грамотасы иегері.
• 2026 жылдың тамыз айында Румынияның Бухарест қаласында өткен Лингвистика бойынша халықаралық олимпиаданың қола медалін еншілеп, мектеп мерейін асқақтатты. «Ұстазы жақсының – ұстамы жақсы», Шыңғысты аталған ауқымды білім сайысына мектебіміздің математика пәні мұғалімі Айгүл Төлегенқызы мен орыс тілі пәні мұғалімі Тайган Бисембайқызының да еңбектерін атап өткен жөн.

Дарынды оқушымыз 2025-2026 оқу жылын Үздік аттестатпен тәмамдап, бірнеше белді жоғары оқу орындарының грант иегері атанды. Таңдауы Гонконг еліндегі City University of Hong Kong университетіне түсіп, бүгінде студенттік өмірге қадам басқалы отыр.

Орал қаласындағы Назарбаев Зияткерлік

мектебінің баспасөз қызметі