Батыс Қазақстан облысының мәдениет, тілдерді дамыту және архив ісі басқармасының қолдауымен «Қазақша QUIZ» облыстық зияткерлік сайысы өтті.
Оған облыстық тарихи-өлкетану музейі ұжымынан «Жайық», Шыңғырлау ауданының мәдениет саласы қызметкерлерінен құралған «Аққұм», Қадыр Мырзалиев атындағы облыстық мәдениет және өнер орталығы ұжымынан «Қадырсарай», облыстық халық шығармашылығы орталығы ұжымынан құралған «Найзағай» сынды командалар және «BILIM» оқыту орталығының «BILIM» командасы қатысып, бақ сынады.
Байқаудың негізгі мақсаты – мемлекеттік тілдің мәртебесін көтеру.
Байқау «сұрақ-жауап», «таныс әуен», «кино», «суреттер сөйлейді», «көзқарас», «тілім – тынысым», «бәс» деп аталатын жеті бөлімнен тұрды.
Нәтижесінде Қадыр Мырзалиев атындағы Батыс Қазақстан облыстық мәдениет және өнер орталығы ұжымының «Қадырсарай» және облыстық халық шығармашылығы орталығы ұжымының «Найзағай» командалары ұпай саны бойынша тең түсіп, келесі финалдық бәсекеге жолдама алды.
Ойын соңында жеңімпаздар бағалы сыйлықтармен марапатталып, қалған командаларға алғысхаттар табысталды, естелік және кәдесыйлықтар берілді.
