Батыс Қазақстан облысы жастар саясаты мәселелері басқармасының қолдауымен, «Ғасыр» жастар қоғамдық бірлестігінің ұйымдастыруымен Атамекен өнер ордасында еліміздегі күйшілік өнерді өскелең ұрпаққа, өнерсүйер жұртшылыққа кеңінен насихаттау, жас таланттар мен шебер орындаушыларды анықтау, дарынды өнерпаздардың кәсіби шеберліктерін арттыру мақсатында ел Тәуелсіздігінің 30 жылдық мерейтойына орай «Күй - тектілік тереңі» атты облыстық жас күйшілер байқауы өтті.
Сонымен қатар байқау барысында жастарға ұлттық құндылықтарды насихаттау мақсатында арнайы ұлтық қолөнер түрлерінен көрме ұйымдастырылып, таныстырылды.
Облыстық жас күйшілер байқауы 2 кезеңді құрап, ақтық кезеңде алғашқы іріктеу кезеңінен өткен ең үздік деген жас күйшілер сайысқа түсті. Сайыс жеңімпаздары 14-18 және 19-29 жас аралығындағы жастардың өнер көрсетулері бойынша анықталды.
Нәтижесінде 14-18 жас аралығы бойынша жүлделі III орынды Кибашова Айзада, II орынды Қайыржанов Эрнест, I орынды Кузанбаев Наурызбек иеленсе, «Көрермен көзайымы» аталымдары Нариманова Жұлдыз бен Қадырғалиева Мадинаға бұйырды. Ал 19-29 жас аралығы бойынша III орынды Темирлан Сыралиев, II орынды Егінғали Қыдырнияз, I орынды Байқұтты Қайрат иеленсе, «Көрермен көзайымы» аталымдарын Рамазан Бекзат пен Умбетова Нұрай қанжығасына байлады.
Байқау жеңімпаздарына ұйымдастырушылар тарапынан арнайы дипломдар, естелік сыйлықтар және қаржылай сертификаттар табысталды.
«Ғасыр» жастар қоғамдық бірлестігінің баспасөз қызметі
