Президент: Жылыту маусымының штаттық режимде өтуі – барлық әкімнің тікелей жауапкершілігі

 «Коммуналдық желілердің жай-күйі – жылдар бойы қордаланып, қате тарифтік саясаттың салдары болған жүйелік мәселе. Жалпы, тарифтерді ұстап тұру мен инфрақұрылымға инвестициялау қажеттілігі арасындағы тепе-теңдікті табу керек. Бұл – негізгі қағида», - деді Мемлекет басшысы Павлодар облысы жұртшылығымен кездесуі барысында.

Қазақстан Президенті инвестициялық төлемдер тек осы мақсаттарға жұмсалуы керектігін және оның меншік иелері үшін негізсіз пайда көзіне айналмауы тиістігін баса айтты.

«Жолдауда монополиялық нарықтардағы «инвестиция орнына тариф» жаңа тарифтік саясатына көшуді тапсырдым. Үкіметтен осы бағытта нақты нәтижелер күтемін. Қазір алдағы жылыту маусымының штаттық режимде өтуі басты мәселе, бұл – барлық өңір әкімдерінің тікелей жауапкершілігі», - деді Қасым-Жомарт Тоқаев.