Құмақсайлықтардың құндылығы – татулығы мен ұйымшылдығы. Бүгін олар ауылды жандандырып, мәселелерді шешуге атсалысатын әкімін таңдап, өз таңдауларын жасауда белсенділік танытуда. 
Көршілер дауыс берді
Көршімен тату-тәтті болуды көздейтін Құмақсай ауылының бұлжымас қағидатына куә болдық.
Абай көшесінің тұрғындары Владимир Нуйкин, Ерлан Шондыбаев, Надир Оджиев ауыл әкімін сайлауға ұйымшылдықпен келді. №355 сайлау учаскесіне аялдап, таңдауларын жасаған олардың адал достығы да бірден байқалады. Бірінің ұлты – орыс, бірінің ұлты – әзірбайжан болса, енді бірі – қазақ. Шағын ғана ауылда көп ұлттың жарасымды ғұмыр кешкені қуантты.
Дауыс беріп болған соң учаске алдында ұйымдастырылған күш сынасу сайысына қатысып, мәз-мейрам болып қайтты.
Құмақсайлық Әміржан алғаш рет дауыс берді
№355 сайлау учаскесіне бас сұққан Әміржан Көшімов өміріндегі ең маңызды сәтті сезінді. Олай дейтініміз, Әміржан бүгін бірінші рет дауыс берді.
– Сайлауда белсенділік таныту – әр кәмелеттік жасқа толған тұрғынның парызы. Бұл күнді көп күттім, - деді ол сөзінде.
Дауыс беруге келгендер күш сынасты
Құмақсай ауылдық округіндегі №355 сайлау учаскесіне асыққан тұрғындар учаске алдында білек күшін де көрсетіп жатыр. Дауыс беріп, таңдау жасаған жұртшылық күш сынасып, маңызды күнді көңілді өткізуде.
Айта кету керек, Құмақсай ауылдық округінің әкімін сайлауға дауыс беру кешкі сағат 20.00-ге дейін жалғасады. Аталған сайлау учаскесіне 445 сайлаушы тіркелген.
Ақтілек Әлібекұлы,
Теректі ауданы
