Бүгін мәдени-демалыс саябағында жас туристер станциясы мен жастармен жұмыс жөніндегі ресурстық орталықтың ұйымдастырумен аудандық «Шаңғы бағдар – 2023» ашық жарысы өтті. Спорттық бағдарлауды насихаттау, бұқара халықты салауатты өмір салтын қалыптастыруға тарту, жаттықтырушылар мен спортшылардың біліктілігін арттыру, аудандағы үздік спортшыларды анықтау мақсатында өткізіліп жатқан сайысқа №3 ЖОББМ, Жаңақала ЖОББМ, Жаңақала мектеп-гимназиясы, Пятимар ЖОББМ, аудандық аурухана, С.Меңдешев ЖОББМ командалары қатысты. Сондай-ақ Батыс Қазақстан облысынан ұлттық деңгейдегі төреші облыстық балалар-жасөспірімдер туризмі және экология орталығының спорттық бағдарлау бөлімінің меңгерушісі Райлан Нұрманов төреші болып келді.
Жалпы командалық есепте оқушылар арасында Жаңақала ЖОББМ І орын, №3 ЖОББМ ІІ орын, Пятимар ЖОББМ ІІІ орын алды. Жалпы командалық есепте ересектер арасында Жаңақала ЖОББМ І орынды, №3 ЖОББМ ІІ орынды, аудандық аурухана ІІІ орынды иеленді.
- Жарыс жоғары деңгейде өтті. Өзімізде құрылғы болмағаннан кейін облыстан төреші шақыртып «Sport ident» құрылғысын алдыртып өткіздік. Бәрі чиппен, электрондық нұсқада өтті, ешқандай бұрмалау болмады. Біздің ауданға да аталған құрылғы қажет. Жастардың бұл жарысқа қызығушылығы көп. Болашақта да өткіземіз деген ойымыз бар, - деді Жас туристер станциясы директорының міндетін уақытша атқарушы Қуат Имашев.
Р.Хамзина,
Жаңақала ауданы
zhaikpress.kz
