Бүгін Жәнібек ауданының әкімі Тимур Шиниязов «AMANAT» партиясы аудандық филиалының ғимаратында алдын ала жазылған Жәнібек ауылының тұрғындарын жеке мәселелері бойынша қабылдады.
Жиынға дербес бөлім басшылары да қатысты. Жеке қабылдауға жазылған он төрт адамның басым бөлігі тұрғын үй, жұмысқа орналасу мәселелерін алға тартса, енді бірі кәсіпкерлік, қайтарымсыз грант, жол салу, прожектор орнату сауалдары бойынша жүгінді. Жәнібектіктердің мұң-мұқтажын мұқият тыңдаған аудан басшысы биыл жаңа үйлер салынған жағдайда кезек бойынша берілетінін түсіндірді. Сондай-ақ қабылдауда көтерілген өзге де өтініштерді жан-жақты қарастырып, таразылаған Тимур Серікұлы барлығы да заң талаптарына сай орындалу қажеттігін айтып, нақты әрі толық жауап қайтарды.
Сонымен қатар ол дербес бөлім басшыларына өз салалары бойынша бірқатар тапсырмалар берді.
Айсұлу Нұрболатқызы,
Жәнібек ауданы
