Бүгін аудан әкімі Тимур Шиниязов «AMANAT» партиясы аудандық филиалының ғимаратында алдын ала жазылған Жәнібек ауылының тұрғындарын жеке мәселелері бойынша қабылдады. Жиынға дербес бөлім басшылары қатысып өздеріне тікелей қатысты сұрақтарға жауап берді.
Жеке қабылдауға жазылған он төрт адамның бірқатары, әдеттегідей, тұрғын үй және жұмыссыздық мәселелерін алға тартса, енді бірі атаулы әлеуметтік көмек алуда туындайтын мәселелер жөнінде айтты. Қабылдауға жазылғандардың арасында тозығы жетіп тұрған тұрғын үйлердің орнына жаңа үй сұрап өтініш тастаған тұрғындар да болды.
Жәнібектіктердің мұң-мұқтажын мұқият тыңдаған аудан басшысы бөлім басшыларымен бірлесе отырып, түскен өтініштер мен шағымдарды жан-жақты қарастырып, тұрғындарды тұшымды жауаптармен қанағаттандырды.
Шағым демекші, аудан орталығында ашылғанына көп болмаған құс фермасына да шағым түсірген тұрғындар болды. Айтқандай, бұл мәселенің шешімі оңай болмайын деп тұр. Жеке кәсіпкерлерді барынша қолдау қажет. Дегенмен қысқы мезгілде қолқаны қабатын иіс жаздыгүні маңына адам жолатпайтын түрі бар, - дейді шағым арқалап келгендер. Жәнібек ауылдық округінің әкімі Ғибрат Айтқалиевтың айтуынша, шағын шаруашылықтағы құс саны 100 мыңнан аспайынша, кәсіп иесіне алыстан орын теп деп айта алмайды екен. Оның үстіне құжаттары да заң талаптарына сәйкес. Ендігіде әңгіменің ашығы шаруашылық иесімен бірлесіп бір ымыраға келу керек болады.
Ал кей мәселелердің шешімі уақыт еншісінде. Мысалы Тимур Серікұлы тұрғын үй мәселесін айтып келгендердің назарына биыл жаңа үйлер салынған жағдайда кезек бойынша берілетіндігін, барлығы да заң талаптарына сай орындалу қажеттігін жеткізді.
Еске сала кетейік, былтыр әлеуметтік осал топтағы азаматтарға 32 тұрғын үйдің кілті табысталды. Аудандық тұрғын үй, коммуналдық шаруашылық, жолаушылар көлігі және автомобиль жолдары бөлімінің басшысы Рустам Аманғалиевтың берген мәліметінше, күні бүгінде 372 азамат үй кезегінде тұр. Жиналыс соңында Тимур Серікұлы дербес бөлім басшыларына өз салалары бойынша бірқатар тапсырмалар берді.
Арай Сейфолла
Жәнібек ауданы
