Ұлттық бірыңғай тестілеуден өткен қаратөбелік түлектердің арасында 8 үміткердің 2-еуі ғана «Алтын белгіні» қорғап шықты. Олар Ақнұр Беркінова мен Асият Хасинова. Қос білімпаз – Қаратөбе мектеп-гимназиясының түлектері.
Ақнұр БЕРКІНОВА, «Алтын белгі» иегері:
- Сынақ кезінде қандай сұрақ-тапсырмалар келеді екен деп іштей қобалжыдым. Бір қарап шыққаннан кейін мектеп бағдарламасының сұрақтары екендігін көріп, өзімді еркін, сенімді ұстадым. Нәтижесінде ата-анамның, ұстаздарымның сенімін ақтап, «Алтын белгіні» қорғап шықтым.
125 балл жинау – мен үшін үлкен жетістік. Ата-анама, білім нәрімен сусындатқан ұстаздарыма ризашылығымды білдіремін.
Ендігі арманым – экономист-есепші болу. Менің ойымша, әр адам ең алдымен біліміне, қарым-қабілетіне сенуі керек. Сонда ғана ойлаған арманы орындалады.
Асият ХАСИНОВА, «Алтын белгі» иегері:
- ҰБТ сынағы – әр түлек білімінің сыналар кезеңі. Сыннан сүрінбей өту де – ең қиын нәрсе. ҰБТ сынағы мен үшін қиынға соқпады десе де болады. Жыл бойы үздіксіз дайындықтың және ұстаздарымның берген білімі арқасында ойлаған мақсат-мұратыма қол жеткіздім.
Менің басты арманым – дәрігер болу. Армандар орындалады дегенге сенемін.
www.zhaikpress.kz
Ертай БИМҰХАНОВ
Серікбай ХАСАНОВ
Қаратөбе ауданы