Ана тілі - әр адамның өз ұлтының жан дүниесі мен мәдениетінен ғасырлар бойы жиған рухани азығынан нәр алатын кіндік тамыры. Тіл – тек қарым-қатынас құралы ғана емес, ұлтымыздың биік тұғыры. Қазақ тілі – ғажайып тіршілік әлемі. Ол - қазақ халқының тарихымен астасып, Қазақстан мемлекетінің тірлігімен тыныстап жатқан құбылыс. Қазақстанда да тіл – қазақ елі үшін бағасын жоғалтпаған құндылық.
Осыған орай 22 қыркүйек күні С.Садықов атындағы аудандық мәдени- демалыс орталығында мәдениет қызметкерлерінің ұйымдастыруымен Тіл мерекесі күніне арналған «Тіл мәртебесі – ел мәртебесі» атты мерекелік шара өтті.
Шарада аудандық ардагерлер кеңесінің төрағасы Уәлиолла Әбішев мерекемен құттықтап, бүгінгі таңда мемлекеттік тілді дамыту жолында бар күш-жігерімізді аямайық! – деген тілегін жеткізсе, Қазталов орта мектебінің қазақ тілі мен әдебиеті пәнінің мұғалімі Абзал Есенғазиев, аудандық мәдени-демалыс орталығының директоры Дархан Жалиев айтулы мерекемен құттықтап, жылы лебіздерін білдірді.
Сондай-ақ шарада аудан көркемөнерпаздары тіл туралы шырқаған әндермен қатар Қазталов орта мектебінің 7 сынып оқушыларының оқыған поэзиясы шараға қатысушы қонақтарға тамаша көңіл-күй сыйлады.
Әсем Болат