Оның жұмысына «Nur Otan» партиясы төрағасының бірінші орынбасары Бауыржан Байбек, облыс әкімі Ғали Есқалиев, саяси бюро мен саяси кеңес, бастауыш партия ұйымдарының және «Jas Otan» жастар қанатының мүшелері қатысты.
Галстуксыз, яғни еркін форматта өткен жиында Бауыржан Байбек партияның облыстық филиалына жетекшілік еткен, бүгінде Нұр-Сұлтан қаласының әкімі қызметіне ауысқан Алтай Көлгіновке өңірдегі жемісті жұмысы үшін алғыс айтып, жаңа қызметіне табыс тіледі. Өңір тізгінін қолға алған Ғали Есқалиевке «Nur Otan» партиясы Батыс Қазақстан облыстық филиалы төрағасының куәлігін табыс етті.
Төрағаның бірінші орынбасары партияның алдында тұрған ауқымды міндеттерге тоқталды. Партия белсенділігін арттыруға, атап айтқанда, азаматтармен және әр адаммен диалог орнату қажеттігіне баса назар аударған Бауыржан Қыдырғалиұлы, әсіресе, партия фракцияларының белсенділігін арттыруға, қоғамдық қабылдау қызметін түбегейлі жандандыруға, бастауыш партия ұйымдарын нығайтуға қатысты нақты тапсырмалар берді.
Партия алдында тұрған басты міндет – халықпен кері байланысты күшейтіп, әр адамның сенім үдесінен шығу екенін ерекше атап өткен ол Елбасы Нұрсұлтан Назарбаевтың барлық стратегиялық бағдарламалары мен мемлекет басшысы Қасым-Жомарт Тоқаевтың сайлауалды бағдарламасының өңірде жүзеге асырылу барысына партиялық бақылауды күшейту керектігін айтты.
Жиында ҚР Президенті сайлауы аясында жүргізілген үгіт-насихат жұмыстарына белсенді қатысқаны үшін бір топ республикалық және облыстық қоғамдық штаб мүшелері мемлекет басшысы Қасым-Жомарт Тоқаевтың алғыс хатымен марапатталды.
Бұдан соң Бауыржан Байбек Орал қаласындағы апатты деп танылған №31 мектепте болып, жақында басталатын құрылыс жұмыстарының жай-жапсарына қанықты.
Мектеп аумағындағы апатты үйлердің тұрғындарымен кездесіп, 45 пәтерлік 9 қабатты үйдің құрылысын көрді.
Сәуір айында басталған құрылыс жұмыстары биыл қазанда аяқталмақ. Айталиев көшесі, 12 және Молодежный көшесі, 1 мекенжайында орналасқан апатты қос үйдің тұрғындарына жаңа пәтерлер осы үйден берілмек. Оралдықтармен дидарласып, жұртшылықтың ұсыныс-пікіріне құлақ түрген Бауыржан Қыдырғалиұлы облыс және қала басшылығына құрылыс жұмысын уақтылы және сапалы аяқтауды тапсырды.
Динара Жұмабекқызы
суретке түсірген Темірболат Тоқмамбетов
zhaikpress.kz
