Қазақстан полициясының 25 жылдығына байланысты өткен шарада облыс әкімі Алтай Көлгінов жергілікті полиция қызметкерлерінің басшыларына жаңа автокөліктердің кілттерін табыс етті.
– Соңғы үш жылдың ішінде мемлекет басшысының тапсырмасына байланысты облыстағы ішкі істер органдарының материалдық-техникалық базасын нығайтуға 5 млрд. теңге берілді.
Биыл бюджеттен қосымша 1,5 млрд. теңге қаржы бөлдік. Облыстық ішкі істер департаменті ғимаратының қасында жаңа құрылыс нысаны бой көтереді. «100 нақты қадам» Ұлт жоспары ауқымында жергілікті полиция қызметі күшейтілуде. Жаңа автокөліктердің біразы ауыл-аймақтағы учаскелік полицейлерге беріледі. Оларға құқықбұзушылықтың алдын алумен жұмыстанып, әсіресе, мал ұрлығымен айналысатындарды әшкерелей түсулеріне жағдай жасалуда, – деген Алтай Көлгінов ішкі істер органдарының қызметкерлеріне алғыс хат табыстады.
Жиында ҚР Ішкі істер министрі, полицияның генерал-полковнигі Қалмұханбет Қасымов мереке байланысты жолдаған жеделхаттың мәтіні оқылған соң, облыстық ішкі істер департаментінің бастығы, полицияның генерал-майоры Махсудхан Аблазимов баяндама жасап, полиция қызметкерлері арасында жаңа әскери шен алғандар және ішкі істері министрінің құрмет грамоталары мен орден-медальдарға ие болғандарды құттықтады. Салтанатты шарада облыс әкімі Алтай Көлгіновке және бірқатар жергілікті атқарушы органдардың басшыларына, ішкі істер органдарының ардагерлеріне «Қазақстан полциясына 25 жыл» төс белгісі берілді.
Атаулы мерекеге байланысты Жеңіс алаңында 25 ақ көгершін мен түрлі түсті шарлар ұшырылды. Тәуелсіздік жылдарында қызмет барысында қаза тапқан 31 тәртіп сақшысын еске алу мақсатында бір минут үнсіздік жарияланды, кейін Ұлттық ұланның жауынгерлері қаруларының ұңғысын көкке қаратып, дүркін-дүркін оқ атты. Алаңда облыстық ІІД-нің арнайы бөлім қызметкерлері мен Тасқала ауданының жол қозғалысының жас инспекторлары жасағы жаттығу түрлерін көрсетті. Салтанатты шара кейін мерекелік концертке ұласты.
Нұртай Текебаев
zhaikpress.kz
