Ел Тәуелсіздігінің 25 жылдығына орай Ақтайсай мәдениет үйінде аналар кеңесінің және мәдениет үйі қызметкерлерінің ұйымдастыруымен «Біз сіздерге қарыздармыз, асыл ана!» атты іс-шара оздырылды.
Айтулы шараның мақсаты тәуелсіздіктің 25 жылдық мерейтойы қарсаңында аудан бойынша көп балалы аналарды ардақтау және отбасылық құндылықтарды насихаттау.
Кештің І бөлімінде аналар кеңесінің төрайымы Алма Елеусінова шараның мақсатын түсіндірді.
Мәдениет үйінің көркемдік жетекшісі Гауһар Жеңісқызы «Қос бәйтерегім» әнін ән-шашу ретінде жолдады.
«Аналар сөз алғанда...» бөлімінде ардақты аналар және көп балалы жас аналар сөз алды.
Аналарымыздың өмірден түйген тәжірибелері мен ақыл-кеңестерін бөлісе отырып, тағы да ән шашуға кезек берілді.
Мәдениет үйінің аккомпониаторы «Әке-ана» атты әнін жолдаса, «Еркетай» балабақшасының тәрбиешісі шараны қазақ биімен әсерлей түсті.
«Аналарға құрмет» бөлімінде қонақтарға естелік сыйлықтар табысталды.
Әсерлі кездесу халықтық «Елім-ай» әжелер ансамблінің орындауында Шолпан Қыдырниязованың сөзіне жазылған Әсет Бейсеуовтің «Қоскөл кеші» әнімен тәмамдалып, көрермендерге жақсы көңіл-күй сыйлады.
Ерболат РАЙСОВ