Жастар жылына орай, Қазталов, Жәнібек, Бөкей Орда, Жаңақала аудандарында спорт кешендері салынады. Жағымды жаңалықты облыс әкімі Алтай Көлгінов бүгін Қазталовтағы көшпелі жиында айтты. Спорт кешенінің құрылысы биыл Қазталов пен Жалпақтал ауылдарында басталмақ.
Жиынға қатысқан үш ауданның ақсақалдары Алтай Сейдірұлына осындай жағымды хабарды жеткізгені үшін алғыстарын жеткізіп, жолға қатысты сұрақтарын қойды.
Жиыннан кейін облыс әкімі Лекер су ұңғымасынан тартылып жатқан ауыз су құбырының жұмысымен танысып, мердігерге алдағы шілде айында бітіруді тапсырды. Аудан орталығына Лекер су ұңғымасынан келетін ауыз су құбырының жеткіліксіз болуына байланысты қосымша екінші құбыр тарту қолға алынған болатын. Қазу және құбыр жүйесін тарту жұмыстарын мердігер «Қалдығайты» ЖШС атқарып жатыр.
Облыс әкімі Қазталов ауданының орталығында салынып жатырған 12 пәтерлік тұрғын үй құрылысымен де танысты. Екі қабаттан тұратын бұл тұрғын үй құрылысына 122 млн. теңге қаражат бөлінген. Құрылыс жұмыстарын «БатысКотлоМонтаж» ЖШС жүргізуде. Осындай 12 пәтерлік 2 қабатты үй Жалпақтал ауылында да салынуда
Құрылыс алаңына келген Алтай Сейдірұлы аудан әкіміне жаңа тұрғын үйді бірінші кезекте көп балалы отбасыларға беру керектігін тапсырды.
Қайрат Жақып,
Суретке түсірген Динара Киндербаева
Қазталов ауданы