Жәнібек ауданы әкімдігі жанындағы жастар ісі жөніндегі кеңес отырысы өтіп, оған аудан әкімі Наурызбай Қарағойшин төрағалық етті. Басқосуда аудандық жұмыспен қамту орталығының директоры Нұрпейіс Елемесов аудан жастарын жұмыспен қамту және осы бағыттағы мемлекеттік бағдарламалардың орындалуы хақында баяндама жасады.
Жиында Жақсыбай және Талов ауылдық округтерінің әкімдері Алмат Қаратаев пен Марат Мұхамбетжанов аталған ауылдардағы жастар саясатының жүзеге асуы жайында хабарламалар оқыды. Аудандық жастармен жұмыс жөніндегі ресурстық орталықтың басшысы Сағынбек Стамов жастардың белсенділігін арттыру, олармен жұмысты күшейту бағытында өз ойын ортаға салды.
Кеңес отырысында сөз алған аудан әкімі Наурызбай Қарағойшин жастарды жұмысқа орналыстыруды көздейтін мемлекеттік бағдарламаларға белсенді қатысу қажеттігін атап айтты. Аудан басшысы, әсіресе, нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасын халық арасында кеңінен түсіндіру жұмыстарын жүргізуді ауылдық округ әкімдері мен құзырлы мекеме басшыларына тапсырды.
Жиын соңында аудан әкімдігі жанындағы жастар ісі жөніндегі кеңестің 2017 жылға арналған жұмыс жоспары бекітілді.
Д.Зеннат
Жәнібек ауданы
