Кешегі аптада Орал қаласында шағын футболдан «Батыс Сырым» лигасының VII және VIII турларының ойындары өтті.
Алғашқы ойын күні «Көздіғараның» жеңісімен басталды. Олар «Өлеңті Zhas» командасын ірі есеп айырмасымен ұтты. Таблодағы есеп 9:0. «Көздіғара» турнирдің фавориті «Жетікөлге» де лайықты қарсылас бола білді. Ойын 7: 5 есебімен, «Жетікөлдің» пайдасына аяқталды.
VI турдың қорытындысы бойынша турнир кестесінде төртінші орынға көтерілген «Талдыбұлақ» үшін кешегі апта аса сәтті болмады. Көктөбе алқабынан келген команда «Абай» командасына 1:9 есебімен есе жіберді.
VIII турдың ойын күнінің соңында «Құспанкөл» мен «Абай» кездесті. Екеуі турнир кестесінде бірін – бірі өкшелеп келеді. Сондықтан, қос мықтының ойындары да тартысты болды. Кездесу 5:5 есебімен, тең аяқталды.
Лиганың сұрмергендерінің көшін «Жетікөлдік» Нұржас Төлепов бастап тұр. Оның «қанжығасында» 27 гол бар. Соңғы ойында Нұржан қарсылас команданың қақпасына 3 мәрте доп тоғытты.
Бауыржан Ширмединұлы,
Сырым ауданы
zhaikpress.kz
