Елдің өсіп өркендеуіне елеулі үлес қосқан, халықтың әл-ауқатын арттыруға атсалысқан, өзі еңбек еткен салада жетістікке жеткен тұлғаларды халқымыз «елтұтқа» дейді. Сондай ардақты жанның бірі ардагер ұстаз — Серікбай Сатуұлы Жапахов.
Казталов ауданына еңбегі сіңген, қатардағы механизатор, көлік жүргізуші, мұғалімнен басшылық лауазымға дейін көтерілген еңбек ардагері бүгінде Орал қаласында тұрады. Казталов аудандық ардагерлер кеңесінің төрағасы Жүсіп Шакуов ақсақалдың өлшеусіз еңбегін ескеріп, оны Батыс Қазақстан облысының «Құрметті ардагері» төсбелгісіне ұсынған болатын.
Жуырда лайықты құрмет иесін тауып, Серікбай Сатуұлына Батыс Қазақстан облысының «Құрметті ардагері» төсбелгісі табысталды. Төсбелгіні Батыс Қазақстан облыстық ардагерлер кеңесі төрағасының орынбасары Ержан Төлегенов пен Казталов ауданы қауымдастығының төрағасы Махамбет Абулхатин ақсақалдың кеудесіне тағып, құттықтады.
Қариясын құрметтеген елдің қашан да болашағы жарқын, мерейі үстем болары анық. Әрқашан да арамызда ақылшы, кеңесші бола жүріп, елді бірлікке, ынтымаққа шақырып, үлгі-өнеге көрсете білген Серікбай Сатуұлындай қазыналы қарттарымыз аман болсын!
Нұр Рахман,
Казталов ауданы
