Облыстық мәдениет басқармасының басшысы Қадырболат Мұсағалиев халықтың мәдени демалысын ұйымдастыру мақсатында өткізілген басты шараларға тоқталды.
Басқарма басшысы 1300 бишінің қатысуымен «Биле, JASTYQ» ірі көлемді акциясын, Қазталов ауданындағы «Ұлы даланың қызғалдағы» ІІ-ші халықаралық этно-мәдени фестивалі, «Рухани қазына» кіші бағдарламасы аясында мәдениет мекемелері мен қызметкерлерінің «Мәдени ландшафт-2019» шарасын атап өтті.
- «Рухани жаңғыру» бағдарламасы мен Орал қаласы күні аясында қазақ халқының материалдық, рухани байлығы - салт-дәстүр, ұлттық ойыны мен тағамдарын әлемге танытып, отандық туризмді дамыту мақсаты және ақылы қызмет түрлерін көрсету бағытында «Ақжайық» этноауыл ұлттық мәдени кешені ашылды.
Ақжайық өңірі – ақиық ақындар мен қарымды қаламгерлер, күміс көмей әншілер мен дәулескер күйшілер дүние есігін ашқан киелі де құтты мекен. Өңіріміздің бірегей тұлғаларының есімдерін ұлықтау, шығармашылық жолын кеңінен насихаттау мақсатында ҚР Халық артисі, «Отан» орденінің иегері, Мемлекеттік сыйлықтың лауреаты, әнші-композитор Е.Хасанғалиевтің әндерін орындаушылардың ХІ халықаралық «Атамекен» ән фестивалі және ҚР Халық артисі Ғ.Құрманғалиевтің 110 жылдығына арналған ІҮ республикалық «Жезтаңдай, күміс көмей, ән еркесі» дәстүрлі ән байқауы ұйымдастырылып, «Ән дүлділі Ғарекең» турне-концерті өтті,-деді басқарма басшысы.
Биыл ҚР еңбек сіңірген мәдениет қызметкері, «Құрмет» орденінің иегері, айтыскер ақын Шолпан Қыдырниязованың шығармашылық кеші, Қазақстан Жазушылар Одағының мүшесі, ҚР Білім беру саласының құрметті қызметкері, ақын, жазушы Дариға Мұштанованың шығармашылық портретіне арналған «Күн-көңіл көктем» прологі және күйші, домбыра жасау өнерінің шебері Едіге Набиевтің шығармашылығына арналған «Өрісті өнер өнегесі» кеші облыстық деңгейде аталып өтті. ҚР еңбек сіңірген қайраткері, Халықаралық «Алаш» әдеби сыйлығы мен«Құрмет» орденінің иегері, ақын Ақұштап Бақтыгерееваның әдеби-сазды кездесулері барлық аудандарда өткізіліп, «ӨЛЕҢ-ӨМІР» әдеби-музыкалық релизімен республикалық деңгейде өтіп, ақынның туған жері Теректі ауданы Ақжайық ауылында аяқталды.
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
