Бүгін Орал қаласындағы Жеңіс алаңында жас жігіттерді әскерге шығарып салу рәсімі өтті. Шараға әскерилер, сала ардагерлері және ата-аналар қатысты.
Жиында сөз алған Орал қаласы әкімінің орынбасары Мирболат Нұржанов сарбаздарға ақжол тіледі.
«Жыл сайын көктем, күз айларында жас сарбаздарды әскерге шақыру науқаны жүреді. Міне, бүгін алдымызда облыстың жас жігіттері әскер қатарына аттанғалы тұр. Әскерге барғалы тұрған жігіттерге тілеріміз, абыроймен өз міндеттеріңізді атқарып, елге аман-есен оралыңыздар. Мықты рух, денсаулық тілейміз. Еліміздің әскері мықты ел болуына үлестеріңізді қосасыздар деп сенеміз», - деді ол.
Көктемгі әскерге шақыру аясында өңірден 35 жас азамат мерзімді әскери қызметке аттанбақ.
«Бүгінгі әскерге аттанғалы тұрған жігіттер қарулы күштердің бірінші командасы болып саналады. Қазір Қонаев қаласына аттанғалы тұр. Бұл – аэроұтқыр әскерлерінің бірі. Азаматтар әскери борыштарын өз еріктерімен өтеуге ынталанып келді. Жігіттердің арасында академиялық демалыс алып бара жатқан студенттер де бар, яғни өз еріктерімен әскерге бара жатыр. Бүгін жігіттердің алдыңғы қатары Қапшағайға аттанса, алдағы уақытта екінші топ Ақтау қаласына, үшінші топ Атырау қаласына барады», - деді БҚО Қорғаныс істері жөніндегі департаменті бастығының орынбасары – жасақтау басқармасының бастығы Альберт Бекмұханов.
Отан алдындағы борышын өтеуге аттанып бара жатқан жігіттерге бізде сәттілік тілейміз.
Гүлмира Сәрсенғали,
Суреттерді түсірген автор
zhaikpress.kz