Өңіріміздің оңтүстік аудандарының күн тәртібіндегі басты мәселелердің бірі - киік мәселесі. Киіктің санын қалай азайтамыз деп жүргенде браконьерлердің дала еркесін заңсыз атып, олжаға кенелуі тыйылмай тұр.
Киікті заңсыз ату дерегі Казталов ауылында да тіркелді. «Қосөзен» шекара бекеті сарбаздарының қырағылығы арқасында киіктің мүйізін алып, оңай жолмен байымақ болғандардың ізі кесілді.
- 3 шілде күні «Қосөзен» шекара бөлімшесі қызметкерлерінің жұмысы барысында Казталов ауылынан 9 шақырым жерде заңсыз киік атушылар қолға түсті. Браконьерлер қолайсыз ауа райын пайдаланып, аңшылыққа шыққан сыңайлы. Ұсталған Казталов ауылының және Орал қаласының азаматтарынан 8.5 мм-лік 15 дана, 20 мм-лік 20 дана оқ-дәрі тәркіленді. Оларға ҚР Қылмыстық кодексінің «Заңсыз аңшылық» 337-бабы бойынша қылмыстық іс қозғалды, - деді «Қосөзен» шекара бөлімшесінің бастығы, капитан Мағжан Тоқтахын.
Шекарашылар халықтың тыныштығын ғана емес, ел азаматтарының заңсыз әрекеттеріне де тосқауыл болуда. Бұл - қызметке адалдықтың бір көрінісі.
Бекарыс Әбіш,
Казталов ауданы
zhaikpress.kz
