Елбасымыздың «Қазақстан жаңа жаһандық нақты ахуалда: өсім, реформалар, даму» атты Жолдауында тек дағдарысқа қарсы шаралар ғана емес, сонымен қатар арнайы стратегия да ұсынылған болатын. Жаңа заман талабында дағдарысқа қарсы кешенді және құрылымдық жаңару бес бағыт бойынша жүзеге асырылмақшы. Оның бірі - бюджет саясатын оңтайландыру. Осы орайда БҚО экономика және бюджеттік жоспарлау басқармасының басшысы Бибігүл Қонысбаева өз ой-толғамын былайша білдірді.
Оның айтуынша, бюджетті қалыптастыру Елбасының қазына қаражатын қатаң түрде үнемдеу туралы тапсырмасына және Бюджет кодексіне сәйкес өңірдің 2016-2020 жылдарға арналған әлеуметтік-экономикалық даму болжамының негізінде жүзеге асырылады. Жалпы, кіріс бойынша облыс бюджеті 109,4 млрд теңге көлемінде бекітілген болса, оның ішінде жеке кіріс 24,4 млрд теңгені құрап отыр. Республикалық бюджеттен 44,8 млрд теңге көлемінде мақсатты трансферттер мен несиелер қарастырылған.
Шығындарды жоспарлауда басты басымдылық азаматтардың жақсы тұрмыс кешуіне жете мән беріледі. Яғни әлеуметтік қолдау, денсаулық сақтау мен білім беру, тұрмыстық жағдайларын жақсарту және жұмыспен қамту бойынша жағдайлар туғызу. Бұл мақсаттарға 42,6 млрд теңге қаралған. Сонымен бірге ауыл шаруашылығы саласын қолдауға 3,6 млрд теңге, көліктік инфрақұрылымды дамытуға 7,7 млрд теңге көлемінде қаражат көзделді.
2016 жылдың 1 қаңтарынан бастап азаматтық қызметшілердің жаңа еңбекақы үлгісіне көшуі іске асырылып, денсаулық сақтау саласының қызметкерлеріне жалақы 7 пайыздан 28 пайызға, білім беру саласының қызметкерлеріне 15-тен 29 пайызға, әлеуметтік қорғау және басқа салалар қызметкерлеріне 28-ден 40 пайызға артты. «Жұмыспен қамтудың жол картасы - 2020» бағдарламасына орай биыл республикалық бюджеттен 1,4 млрд теңге бөлінген, оның ішінде 489,0 млн теңге ауылдық жердегі кәсіпкерліктің дамуына, 488,1 млн теңге инфрақұрылымдық жобаларды жүзеге асыруға, 427,5 млн теңге жұмысқа орналасуға жәрдемдесу бойынша шараларға көзделді.
«Бизнестің жол картасы - 2020» бағдарламасын іске асыру аясында республикалық бюджеттен жеке кәсіпкерлікті қолдауға 1784,6 млн теңге мақсатты трансферттер қарастырылды.
Ұлттық қордан бөлінген мақсатты даму трансферттері 1,4 млрд теңгені құрады, оның ішінде инженерлік-коммуникациялық инфрақұрылымды жобалауға, дамытуға және жайластыруға 1,1 млрд теңге және Шыңғырлау ауданының орталығындағы 290 орындық балабақша құрылысына 287,83 млн теңге берілді.
«2016 жылға арналған облыс бюджеті әлеуметтік бюджет болып табылатынын атап өткен жөн. Алдымызда тұрған оңтайландыру шаралары мемлекеттің әлеуметтік міндеттемелеріне кері әсер етпейді, олар толық көлемде орындалатын болады», деп түйіндеді ойын Б.Қонысбаева.
Елжан Ералы
