Ел Президенті Қасым-Жомарт Тоқаев Ата Заңымызға түзетулер енгізу бойынша жалпыхалықтық референдум өткізуді ұсынған болатын. 5 маусым күні елімізде республикалық референдум өтетіні баршамызға мәлім.
Осыған орай бүгін Қаратөбе аудандық қоғамдық штаб мүшелері Мәулен Қожахметов пен Халық Наурзалин аудандағы күрделі салалардың бірі білім беру бөлімінде болып, ұжым қызметкерлері және онлайн байланысқа шыққан мектептердің директорларымен кездесу жиынын өткізді.
Кездесу жиыны барысында штаб мүшелері еліміздің негізгі Заңына енгізілетін өзгертулер мен толықтырулар туралы айтып, түсініктер берді.
– Қазақстандықтар тарихи дамудың қарсаңында ел алдындағы жауапкершілікті сезіне отырып, референдум өткізу – саяси дамудың келесі кезеңі екендігін түсіну қажет. Бұл уақыт талабы. Себебі ел тағдырын анықтайтын реформаларға тек депутаттар ғана емес, бүкіл халық қатысу керек.
Егер референдумда дауыс берушілер аталған өзгерістерді қолдаса, онда біз Президент айтқан Жаңа Қазақстанды, әділетті Қазақстанды құруға мүмкіндік аламыз. Бұл ел дамуы үшін маңызды қадам, - деді Мәулен Қожахметов.
Ерболат Райсов,
Қаратөбе ауданы
zhaikpress.kz
