ҚР Президентінің баспасөз қызметінің хабарлауынша, Мемлекет басшысы Қасым-Жомарт Тоқаев Ядролық сынақтарға қарсы халықаралық іс-қимыл күніне орай отандастарына үндеу жолдады.
Фото: aqorda_resmi
Президент бұдан 35 жыл бұрын Семей ядролық полигонының жабылуы мен еліміздің төртінші ядролық арсеналдан өз еркімен бас тартуын бейбітшілік пен болашақ ұрпақ алдындағы жауапкершілікті көрсететін тарихи шешім деп атады.
Үндеуде Қазақстанның антиядролық қозғалыстағы көшбасшылық ұстанымы өзгермейтіні және ядролық державаларды диалогқа келуге, сондай-ақ Ядролық сынақтарға жан-жақты тыйым салу туралы шарттың күшіне енуін тездетуге шақыратыны айтылды. Сондай-ақ Президент атом энергиясын тек жасампаз мақсатта пайдалану қажеттігін және референдумда халық қолдаған ядролық энергетиканы дамыту бағыты еліміздің экономикалық әрі ғылыми-техникалық өрлеуіне серпін беретінін атап өтті.
