2020 жыл Қазақстан Республикасында"Еріктілер жылы" деп жарияланды. Ал "Волонтерлік қызмет туралы" ҚР Заңы 2016 жылы қабылданған болатын. Заңның 6-бабының 7-тармағында мәдени мұраны сақтау саласын қолдауға ерекше назар аударылған.
Осы жағдайларды назарға ала отырып, тарих және мәдениет ескерткіштерін сақтау бойынша волонтерлік қызметке көптеген адамдарды, жастарды, студенттерді, сондай-ақ қалпына келтіру, сәулет, тарих, өнертану саласындағы мамандарды тарту мақсатында "Ғылыми зерттеулерді қолдау қоры" жеке қоры "АТАМҰРА-НАСЛЕДИЕ" жобасын (Мәдени мұра волонтерлар мектебі) жүзеге асырды.
Жоба аясында, 8-10 қараша Ақжайық, 14-15 қараша күндері Теректі, Бөрлі, Шыңғырлау аудандарына экспедиция ұйымдастырылды. Экспедиция барысында қорғауға алынбаған ескерткіштер тіркеліп, тізімге алынып, фото, видео түсірілім жасалып, GPS координаттары алынды.
16 қараша 50-ге жуық тілек білдіруші үшін қалалық экскурсия ұйымдастырылды. Экскурсияны Нина Пустовая жүргізді. Экскурсияға қатысушылардың арасында колледж, университет студенттері, мектеп оқушылары, аудан мектептерінің мұғалімдері және қызығушылық танытқан еріктілер болды.
Сонымен қатар, 17 қараша күні мәдени мұраны сақтау бойынша семинар-тренинг өткізілді. Қатысушылар өлкетанушы, этногроф, археолог мамандардың, БҚО тарихи-мәдени мұраларын қорғау жөніндегі мемлекеттік инспекциясы мамандарының практикалық дәрістерін тыңдады.
Қатысушылар ХІХ ғасырдың құлпытастарындағы сандарды оқуды, ескерткіштің төлқұжатын толтыруды, археологиялық қазба және этнографиялық зерттеу негіздерін үйренді.
Семинар-тренингке қатысқан әр ерікті жаңа мағлұматтар біліп, жоба ұйымдастырушыларына ризашылықтарын білдірді. Шара соңы естелік суретке түсумен және марапаттаумен аяқталды.
Айболат Құрымбаев