Биыл қар мол болды. Оның үстіне наурыз ортасында соққан дүлей боран біраз көшелерді жауып, арықтарды бітеп тастады. Бәйтерек ауданының орталығы Переметный ауылында арықтарды тазарту жұмыстары басталды. Су басудың алын алу мақсатында ұйымдастырылған игі шараға аудан орталығы тұрғындары мен барлық мекеме, ұйым жұмысшылары мен басшылары белсенді атсалысуда.
Қолдарына күрек алып, бел шеше жұмысқа кіріскен азаматтар Гагарин, Жеңіс, Орал, Әуезов, Алматы көшелеріндегі суағарларды қардан арылтты.
Уақтылы атқарылған жұмыстың арқасында аудан орталығындағы барлық арықтар тазартылды.
Сонымен қатар арнайы бригадалар кей көшелердің суағарын жөнге келтіру жұмыстарын да жүргізуде.
Адам күші жетпейтін жерлерге арнайы техника шығарылып, қар суы ағатын орындарды аршуда. Ал, суға кететін аумақтар биліктің басты назарында.
Осы ретте аудан және ауыл басшылығы су басу ықтималдығы жоғары орындардың қары аршылмай қалған жағдайда әкімдікке хабарласып, тасқынның алдын алу жұмысына немқұрайлы қарамауын сұрайды.
Жалпы көктемгі су тасқынының алдын алу жұмыстары тек Переметный ауылында ғана емес, Дариян округінде де қолға алынды. Қазіргі таңда күш біріктірген дарияндық ағайын ауыл ішіндегі арықтарды толықтай тазартып, су ағатын орындарды ретке келтірді.
Басқа округтер де қалыс қалып жатқан жоқ. Наурыз айының соңына дейін, мүмкіндік болған жағдайда сәуірде де аталмыш жұмыстар өз жалғасын таба бермек. Өйткені тұрғындар қауіпсіздігі басты назарда.
Тазалық – ең алдымен мәдениеттіліктің көрінісі. Оның үстіне лас, күл-қоқыс қаптаған аумақта өмір сүру адамның денсаулығына оң әсер етпейді. Арық тазалау да, үй алдындағы қарды аршу да мәдениеттіліктің көрінісі. Баршамыздың қауіпсіздігіміз үшін жасалып жатқан жұмысқа сырттан қарап қалмай, ел болып араласқан да жөн секілді. Игі үрдіске тек белсенділер ғана емес, барша аудан азаматтары түсіністікпен қараған жағдайда ғана үлкен қауіптің алдын алуға болады.
Түгелбай Бисен,
Бәйтерек ауданы
zhaikpress.kz
