Бүгін еліміздің қоғамдық-саяси өміріндегі маңызды күндердің бірі. Жалпыхалықтық референдумда қабылданған Қазақстан Республикасы Конституциясына енгізілген өзгерістер мен толықтырулар күшіне енді. Бұл тарихи шешім ел азаматтарының ерік-жігеріне сүйенгендіктен, жаңарған Ата Заң көпшілік арасында Халықтық Конституция деген атауға ие болды.
Халықтық Конституция – заң үстемдігін нығайтып, әділеттілік қағидаттарын орнықтыруға бағытталған маңызды құжат. Ол мемлекет пен қоғам арасындағы өзара жауапкершілікті күшейтіп, демократиялық құндылықтарды дамытуға және азаматтардың құқықтары мен бостандықтарын қорғауға қызмет етеді.
Ата Заң – еліміздің тәуелсіздігі мен тұтастығының, қоғамдық келісім мен тұрақтылықтың басты кепілі. Сондықтан Конституцияда айқындалған қағидаттарды құрметтеу, заң талаптарын сақтау және елдің дамуына үлес қосу – әрбір азаматтың ортақ міндеті.
Халықтық Конституцияның күшіне енуі Қазақстанның жаңару жолындағы тарихи бетбұрыстың нақты көрінісі. Бұл өзгерістер әділетті қоғам қалыптастыруға, мемлекеттік басқару жүйесін жетілдіруге және халықтың әл-ауқатын арттыруға бағытталған ұзақ мерзімді реформалардың берік құқықтық іргетасы болып қала бермек.
Асылбек Нәсіпқалиұлы,
Казталов ауданы
