Осыған дейін белгілі айтыс ақыны, блогер, «Aidyn nury» қоғамдық қорының төрайымы Айнұр Тұрсынбаеваның Сырым ауданына 1 дана оттегі концентраторын жіберетін болды деп хабарлағанбыз. Концентратордың тағы 1 данасын продюсер, жерлесіміз Алпамыс Шаримов әлеуметтік желідегі оқырмандарымен күш біріктіріп, қаражат жинап, сатып алды. Аппараттар Түркиядан Жымпитыға жеткізіліп, Сырым аудандық орталық ауруханасына тапсырылды.
Қазақстанға Қытайдан жолданған гуманитарлық көмектен де біздің ауданға үлес тиді. Аспанасты елінен келген бір-бір қорап медициналық бетперде, қорғаныш көзілдіріктері мен бірреттік костюмдер және 6 дана пульсоксиметр мен 2 тепловизор коронавируспен күресте жүрген сырымдық дәрігерлерге қомақты қолдау болып отыр. Ал «Жасыл ел» жастар еңбек жасағының облыстық штабы 200 литр таза ауыз су жіберіпті.
Жәрдем-көмектерді өңірлерге тасымалдау жұмыстарын «DAULETTEN» қоғамдық қоры ұйымдастырса, оларды аудандық ауруханаға Сырым аудандық жастармен жұмыс жөніндегі ресурстық орталығының волонтерлары жеткізіп берді.
Айжан Амангелдина,
Сырым ауданы
zhaikpress.kz
