Тәуелсіздіктің 30 жылдығы және Қазақстандағы балалар мен жасөспірімдердің кітап оқуын қолдау жылы аясында Ақжайық аудандық мәдениет, тілдерді дамыту, дене шынықтыру және спорт бөлімі, аудандық орталық кітапхананың ұйымдастыруымен «Кітап оқып, сыйлық ұтып ал» атты аудандық байқау өткен аптада мәреленді. Байқау мақсаты – жас ұрпақтың кітапқа деген сүйіспеншілігін ояту, көркем әдебиетке деген қызығушылығын арттыру.
Аталмыш сайыста 6-8 және 9-13 жас аралықтарынан 100-ден астам оқырман бақ сынаса, оның тек 32-сінің ғана жұмысы талапқа сай орындалған. Оларға арнайы құрылған комиссия баға беріп, жеңімпазды анықтады. Айта кету керек, аудандық кітапхана заманауи ғаламтор жүйесін тиімді пайдаланып, әрі өз оқырмандарын да осы заманауи үрдіске бейімдеп келеді. Соған орай сайысқа қатысуға ниетті ұл-қыз өтінішті кітапхананың INSTAGRAM әлеуметтік желісіндегі «І – LIB» парақшасына тіркеліп қалдырған болатын. Сондай-ақ байқауға қатысушы аталған парақшаға 10 досын тіркеп, пікір жинады. Оқуға ұсынылған шығармаларды электронды немесе кітаптан оқып шыққаннан кейін олар өз көркемдеуімен оның мазмұны бойынша альбом құрастырды.
Аудандық кітапхананың мәжіліс залында өткен шарада ішкі саясат бөлімінің басшысы Армат Хайруллин алдымен жеңімпаздарды құттықтады.
«Осындай игі шараны ұйымдастырған ұжымға алғыс айтамын. Осындай білім сайысы алда да жалғасын таба берсін. Өсіп келе жатқан ұрпақтың білімді болуы – заман талабы, ел болашағының жарқын болатындығының кепілі», – деді ол.
Байқау жеңімпаздарына келер болсақ, олар: 9-13 жас аралығында Абай атындағы мектеп-гимназияның 8 сынып оқушысы Аруна Зайдуллина және 6-8 жас аралығында С.Ошанов атындағы орта мектептің 1-сынып оқушысы Інжу Ержан. Екеуіне диплом және аудандық кәсіпкерлердің демеушілігімен соңғы үлгідегі велосипед табыс етілді. Жеңіске жеткен үздіктер бұған дейін де осындай сайыстарға қатысып, сан жүлдемен марапатталған.
Шараға бөлім, мекеме ұйым басшылары қатысса, сондай-ақ кітапхана қызметкерлері түрлі әлеуметтік желілер арқылы тікелей эфирге шығып, желі қолданушыларымен бөлісті.
Аида Асылбек,
Ақжайық ауданы
zhaikpress.kz
