Ел Тәуелсіздігінің 30 жылдығы аясында Бәйтерек аудандық орталықтандырылған кітапханалар жүйесінің ұйымдастыруымен қолға алынған «Кітап - рухани байлықтың бастауы» атты библиокеруен жалғасуда.
Аталмыш жоба кітап оқу мәселесін қоғаммен бірлесе қолға алып, ұлттық әдебиетіміздің ең үздік туындыларын насихаттауды және тұрғындар назарын кітап оқуға аударуды, қызығушылықтарын арттыруды көздейді. Сонымен бірге кітапты көп оқитын орта қалыптастыра отырып, көпшіліктің әлемдік мәдени құндылықтар көзіне еркін қол жеткізуін қамтамасыз етуді, оқырмандардың сұранысын зерттей отыра оларға ақпараттық қызмет көрсетуді мақсат етеді.
Жақында кітапханашылар библиокеруен жобасы аясында Достық (бұрынғы «Семиглавый мар») - Орал бағытындағы жолаушылар пойызына отырып, «Асыл сөзді іздесең, Абайды оқы, таңырқа» тақырыбында ақпараттық жұмыс жүргізді.
Шарада кітапханашылар жолаушыларды қазақ жазба әдебиетінің және әдеби тілінің негізін қалаушы, һакім Абай Құнанбайұлы шығармалары жайлы құнды деректермен, кітапхана қорына жаңадан келіп түскен оқулықтар таныстырып, заманауи мотивациялық бағыттағы кітаптарға шолу жасады. Ерекше жағдайда өткен жолаушылар мен кітапханашылар арасындағы диалог түсіндірме жұмыстарымен ғана шектелмеді. Ұйымдастырушылар ағайынға тақырыпқа сай викториналық сұрақтар қойып, оларды қызықтыра түсті.
Жыл ортасында бастау алған жоба осы кезге дейін ағайынға «Зердеңді ашар 30 кітап», «Жаңа ғасырдың – жаңа кітаптары» секілді атаулармен таныстырылған болатын. Бұл игі бастама аясында, ұсынылған оқулықтарды ұсыну арқылы оқырманның әдеби талғамын көтеріп, кітапханаға деген көзқарастарын өзгертуге және кітапхана жұмысын жандануына өз септігін тигізері сөзсіз.
-Жоба жаз айларында бастау алды. Библиокеруен аясында ойшылдардың еңбектерімен қатар, заман талабына сай қазіргі сұраныстағы мотивациялық кітаптарды таныстырылудан басталған болатын. Тұсауын енді ғана кескен жобамыз, жалғасын міндетті түрде табады. Оқимын деген жанның сұранысын қанағаттандырар тың идеяларымыз көп. Оның барлығын шама-шарқымыз келгенше іске асыруды көздеп отырмыз,- дейді кітапханашы Дина Мамбеталиева.
Назерке Сыйлыбаева,
Бәйтерек ауданы
zhaikpress.kz
