ҚР Ұлттық ұланның «Батыс» өңірлік қолбасшылығына қарасты 5517-әскери бөлімінің әскери оркестрі «Жанашыр жүрек» акциясы аясында Орал қаласындағы «Балалар ауылында» болып, шағын концерт ұйымдастырды.
Кездесу барысында тәртіп сақшылары балалармен отансүйгіштік турасында әңгіме айтып, түрлі сайыстар мен ойындар өткізіп, жасөспірімдерге тәтті сыйлықтар тарту етті. Өз кезегінде Ұлттық ұландық әскери музыканттар плац-дефиле көрсетті.
«Кірген кезде балалардың бойынан бір сағыныш, әке-шешеге деген құрмет сезіліп тұрады. Біз осындай бүлдіршіндерге жәрдемдесуіміз керек. Олардың арасында да ел абыройымен қорғайтын болашақ Отан қорғаушылар, көк туымызды желбіретіп көтеретін мықты спортшылар мен атақты ғалымдар шығуы мүмкін», – деді 5517-әскери бөлімі командирінің тәрбие және әлеуметтік-құқықтық жұмыстар жөніндегі орынбасары подполковник Жәнібек Сәрсенов. Шара соңында әскери оркестрдің дирижеры капитан Олег Файхнер, әскери бөлім атынан баларға денсаулық тілей отырып, алдағы уақытта мұндай іс-шаралар тұрақты түрде жалғасатынын атап өтті.
Ертуған Әубакир,
капитан
