Кейбір адамдардың өмір жолы қызметтік лауазымдарымен емес, артында қалған ізгі істерімен өлшенеді. Олар күн сайын көзге көрінбейтін ерлік жасап жүреді. Біреуге үміт сыйлайды, біреудің дертіне дауа болады, енді бірінің өмірге деген сенімін оятады. Осындай жандардың қатарында Сырым аудандық ауруханасының мейіргері Гүлжамал Қайырғалиева бар.
Ақ халат кигеніне қырық жылдан асса да, ол мамандығына деген сүйіспеншілігін жоғалтқан емес. Жас күнінде таңдаған жолына адал болып, бүкіл саналы ғұмырын адам денсаулығын сақтауға арнады.
Алғабас ауылының қарапайым қызының арманы адамдарға көмек беру еді. Сол арман оны медицина саласына алып келді. Орал қаласындағы медицина училищесін тәмамдаған жас маман еңбек жолын аудандық аурухананың қабылдау бөлімінде бастады. Содан бері талай буынның саулығы үшін тер төгіп келеді.
Медицина – тек білім мен тәжірибені ғана емес, үлкен жүректі талап ететін мамандық. Гүлжамал Жеңісқызы осы қасиеттердің барлығын бойына жинай білген жан. Әсіресе балалар бөлімінде ұзақ жыл еңбек еткен кезеңі оның өміріндегі ең жауапты әрі ең шуақты жылдардың бірі болды. Баланың жылағанын жұбатып, ананың көңіліне медеу болып, әр науқастың жағдайын өз баласындай қабылдау – оның күнделікті жұмысының ажырамас бөлігіне айналды.
Уақыт өткен сайын тәжірибе толысып, жауапкершілік жүгі де артты. Бүгінде стационар бөлімінде қызмет атқарып жүрген білікті маман әріптестері арасында беделді, науқастар арасында сыйлы. Оның жылы сөзі мен қамқорлығы кейде дәріден де күшті әсер ететінін пациенттердің өздері жиі айтып жатады.
Көпшілік медицина қызметкерінің жұмысын тек ем-доммен байланыстырады. Алайда олардың әр жұмыс күнінің артында ұйқысыз түндер, алаң көңіл, адам тағдыры үшін алаңдау жатыр. Гүлжамал Жеңісқызы да осы ауыр әрі жауапты жолды таңдағанына ешқашан өкінген емес. Өйткені оның басты марапаты – жазылып шыққан науқастың алғысы мен халықтың сенімі.
Қоғамдық жұмыстарға да белсене араласып, салауатты өмір салтын насихаттауға үлес қосып жүрген тәжірибелі маман талай жас қызметкерге бағыт-бағдар беріп келеді. Оның өмірлік тәжірибесі мен еңбек жолы кейінгі буын үшін үлкен мектеп деуге болады.
Адам өміріндегі ең үлкен байлық – халықтың ықыласы. Осы құрметке адал еңбегімен жеткен Гүлжамал Жеңісқызының ғибратты ғұмыры – мамандыққа деген сүйіспеншіліктің, жауапкершілік пен адамгершіліктің жарқын үлгісі.
Осындай жандар барда ақ халаттың абыройы әрдайым биік, медицина саласының мерейі әрқашан үстем болмақ.
Шынар Молданиязова,
Сырым ауданы
